كحل عرب

الحلقة 14

#كحل_عرب
(بيت بيوت )

((( بقلم زينب ماجد )))

الحلقة -14-
(بوادر الحب )

أنتِ روحي وراحتي
وآخر ندى الـ عالورد ينزل

انتِ ليلي ولالتي وتفاحتي
الجمعت حلاة الشمس والظل ..!
لـِ عريان السَيد خَلف ||🤍

هدية : ساعة النفج الدرب سرحان كض دربه و طلع للسماوة ووصاني اديرن بالي اعلى الجهال وما اخليهم يطلعون .

العراق انكلب فوك حدر ..
اذا هكو واحد مشارك بالانتفاضة يجرون اهله كلهم يعدمونهم .. واللي يذبونهم من المروحيات للكاع ويطك ويموت ، واليعلكونهم على التيل جدام الوادم و يظل معلك .. وابيوتهم هدموها اعلى عوايلهم بجهالها ونسوانها .

ضاكت روحنا اعلى كثر ما سمعنا وادم انجتلت
والوضع ما ينحمل السوك نار ..
طبقت البيض صارت ب٣٠ الف عراقي وراتب الجندي العراقي ١٢ الف ... شحط بكارتي و شطعم جارتي ، الوادم ماتت جوع .. وجثير ناس جتلها الضيم .

كهرباء ماكو عبن بوش قصف بغداد
والمحافظات طلعن عن السيطرة ليما قصفوهن وردن و الشمال صار اقليم لوحيده .
ماي مكطوع .. وين يالة يجري الماي وتغسل .. وانفسنا ضاكت كلش وبس تحجي انت تبعي وتنجتل انت وعايلتك .

السمعته جاسم ال ثجيل شارد من السماوة و ماخذ عوايله وياه .. ولهسه ما طايحين اثره .. وسرحان متسودن عبن راديون وجهالها وياه و اخبار توصل  جثير ناس كضوهم على الحدود و دفنوهم بالصحرا وهم عايشين هم و عوايلهم .

حمدان وكف بنص مضيف ال ثجيل و اعلن ولائه للسيد الريس وتبرى من جاسم و كام يشتم بيه ، و هالتصرف مو غريب جثير ناس تبرت من عزازها خوفا على عوايلها من الموت .. خاطر لا ينعدمون .

وجثير ناس صارت تتلوك للامن وتمدح بالسيد الريس خاطر يأمنون على ارواحهم او هلبت يحصلولهم شي منهم بنص هالجوع الكتل الوادم .

انكلب السلف فوك حدر وانا ابيتي .. الله نقذنا رجلي عده بستان و نكدر نعيش بخيره ، اهلي ضامهم الضيم

خوبن ايمان المسكينة جابت بنية كبل حرب الكويت بشهر سمتها ( صبا ) .. و صبا بينها وبين الاء ماكو ١١ شهر .. و ذيج تريد حليب و هاي تريد حليب ، شالتهن وذبتهن على حليب الحصة ..

صدك ولنه تجي هالغمة هاي وانكطع الحليب من الحصة .. فطمت الاء و ظلت صبا عمرها ٨ اشهر تلوع تريد حليب .. وابوي منين يجيب الحليب غالي ما يكدر يوفره .

خب كتلها : انت موش كتلتي روحج و كتيلي البت اخذيها شو من جبتيها استعزيتي بيها .

ايمان : الضنا عزيز يهدوة شسوي اروح اروح انطي وحدة من كلبي

شلت البنية : خففيلها الحليب جا شسوين .
عاينت ليها ، شلون معاني حليوات .. بيها من ابوي هواي ابوي ضعيفون صدك زلمه جبير و الشيب ترس راسه بس ملامحة حليوات ، خشمه مقلم .. حلكه صغير  شفايفه ارفاع عيونه مكحلات .