part:1

5K 243 43

انطفئت اضواء قاعة الزفاف..معلنه دخول العروس..
حيث اصبح لون القاعه خافت جدآ..
دخلت الى القاعه ممسكه بيد اميرها..والضوء مسلط عليهما فقط..كانت جميله جدآ كالاميرات..بفستانها *الاوف وايت*المنفوش من تحت وكان الفوق مكشوف الصدر حيث لون بشرتها البيضاء طاغي على كل شيء .. وكان شعرها المائل للشقار اعطاها جماليه اكثر.. وكان هو بجانبها رجل وسيم بكل معنى الكلمه..كل فتيات القاعه حاسداتها عليه..
دخلو على انغام اغنيه عبالي حبيبي.. حيث لم ترضى هي بان يدخلو على اصوات الاغاني العراقيه الصاخبه ككل الاعراس المعروفه عند للعراقين حيث عندما يدخل العرسان يضع صاحب ال دي جي اغاني صاخبه وكل من في القاعه يستقبلهم بالرقص والفرح.. هو اراد هذا الشيء ولكن تسديدا لرغبتها وضع لها اغنيه عبالي حبيبي..
وصل كلاهما الى الكوشه وكانت باللون البنفسجي ..فتحت اضواء القاعه وكل من في القاعه صفق لهما..
كانت اجواء القاعه اشبه بالحلم كانت باللون البنفسجي ..وكانت قطع الكرستال في السقف تعطي جماليه وفخامه..نعم انها تحب الاناقه والفخامه..
وكان اسمهما في كل مكان...
اما انا كنت واقفه في الزوايه انظر اليهما وابكي ..
اتت امي قاطعه بكائي..
_ماما شبيج هاي بدل ماترحين يم اختج واكفه تبجين خلي هاي الدموع لبعدين
_هىء هىء..ماما شلون حفاركها
_يوو بنتي شبيج كلنا هيجي سوينه من تزوجو خواتنه..بعدين من تجي خطار تضوجين منها وتكوليلها روحي لبيت رجلج زعجتينا
_ههه ..لا اني مااكول هالشي خل تجي عدنا اصلا شلون البيت راح يفرغ عليه كلش..
_بنتي يجوز انتي هم متضلين هم تجيج قسمه وتروحين الا اني شلون بيه شلون حفاركم منو تارس عليه البيت غيركم
بكت امي ...
_اش ماما هاي جايه عود تسكتيني دشوفي انتي بجيتي بدالي ههه
_عابتلج غير انتي بجيتيني ..شوفي كل ام تتمنى اولادها يتزوجون ويستقرون..بس فراقهم صعب
_اوو ماما يلا روحي ديصيحولج
_ييي اللهم العنك ياشيطان دشوفي لهيتيتي ..انت هم روحي عدلي مكياجج وروحي سلمي ع الناس عيب لان كلها تسأل عليج يردون يشوفوج..
_اوك مامي رايحه اعدل واروح اسلم ..ولو مالي خلك اجامل..
ذهبت الى الحمام..وقفت امام المرآه ..واتت امرآه الي
_ياماشاء الله انتي جنى اخت العروس مو
_اي خاله ..
_ماشاء الله شهالجمال..مااعرف امج وين ضامتكم
_ههه خاله ضامتنه بباكيت ههه
_ههه فدوة تخبلين تعالي انطيني بوسه
يااللهي كانت قبلتها كالانتقام ..اشعر بان خدي قد انقطع عن جسمي
_ع كيفج المكياج خربتي خررب مو بوسه حجامه*قلتها بصوت منخفض جدا بيني وبين نفسي * محاوله ابعادها..
خاله اني رايحه امي تصيحلي ..
_اي خاله من فدوة لطولج روحي بنيتي
طلعت من الحمام وانا متنرفزه واتكلم مع نفسي وهناك صادفتني صديقتي فرح
_ها جوجه شبيج تدردمين
_اي غير هاي اللزكه عابت وحده كضتني تكول امج وين ضامتج وشبعتني بوس حتى مكياجي تخربط
_عااا هههه صدك عود هاي منو تعرفيها..ومكياجج مابي شي لتخافين بس يحتاجلج شوي حمره
_وين اعرفها وحده لطشه هسه بس لا عدها ابن وتخطبني اله وتلطش .. يوو شوف نسيت الجنطه بالحمام حبابه دخلي جيبيها لا هاي تلطش بيه كوه فلتت منها ..هسه اني بيا حال
_هههههه اييي هسه حدخل اجيبها
_مو تطولين
دخلت فرح الى الحمام وخرجت بعد مده قصيره..
_ولج جوجه هاي كاعده وتحش بهالجكاير
_عااا صخام ولج تدخن..طبعا دريت بيها مو راحه يمعوده امي منين تعرف هالنماذج..استغفر الله
_يوو عوفج منها تعالي احطلج حمره..ولج شهالجمال كلها صفنت عليج والفستان يجنن..اويلي لو ولد جان تزوجتج
_ههههه عابت ..شيكرا طبعا اني بكل الاوقات حلوه..
_يؤبرني البك ..حطي حمره حمره مو لون فاتح لان هسه عرس
_لا ..شيفكني من نيرمين كالتلي لتحطين حمره حمره حتى لا اطلع ابرز من عدها
_اوو جبح هاي اختج غير غياره يعني هسه هي العروس وكل الاضواء عليها ولاحكتج انتي وتغار..ماعليج حطي احمر انتي مو ع مزاجها
_يعني متعرفيها شنو..اي والله احط اني مو ع مزاجها
_يلا ولج راح اموت اريد اركص مااستحمل بعد
_ههه يومه يومه ادري بيج انتي ع حس الطبل خفن يارجليه
_هههه مشكلتج تعرفني يلا لج
_هههه يلا وهلا هلا
خرجنا انا وفرح الى صاله العرس وكان المعازيم بعضهم يرقص ..والاخرين يأكلون..والبعض الاخر ينظر للاخرين ماذا يلبس او اجواء اهل العريس واهل العروس ..ومن اتى الى الحفل اي بين قوسين *المنافقين*..كانت اجواء الفرح في القاعه وكانت نرمين كعادتها تنظر فقط والابتسامه قليلا ماتظهرها حيث كان زوجها يتكلم معها وهي تضحك تاره وتسكت تاره اخرى
اما انا ف حاولت ان امتع نفسي الى اخر حد ..حيث شغلت اغنيه وليد الشامي..
هذا حبييي احبه كولش..
_ولج فوفايه شوفي يااغنيه
_ييي اغنيتنه ولج معليه تعالي نركص بالنص
_ييي يلا
وبدآنا بالرقص
_لج سمعي يملكني كلي جا وين اولي كيمر جنوب بوجتنه وغمازه كردش
_عابتلج جنيوه يعني تغوريني بغمازتج اصلا بعد اسبوع اروح للطبيب واسويلس اثنين
_لا عيني لا اكو احلا من الطبيعي
_هههه عابت . لج شوفي نيرمين شلون تخوزر بيج
_اهووو ..شأسويلها يعني
انتهت الاغنيه ..وكان الجميع ينظرون الينا انا وفرح لاننا اجمل البنات في القاعه.. كثير من السيدات وضعونا في قائمه زوجات اولادهم ...
بعدها نادت عليه نيرمين بعد قيام زوجها للسلام على المعازيم
_جنى خاتون اني شنو كلتلج ..مو كلتلج ثكلي لتفشليني كدام اهل زوجي
_اه لا بربج ..يعني شنو سويت بلا هالمره اذا ماعاجبج وفشلانه مني لتكوليلهم اني اختج اوبالاحرى تردين ارجع للبيت خاف ضجتي مني ..واتمنى ارجع بس عيب زحمه بحقج وبحق ماما
_يلا بس بلا كلام ماصخ ...وثاني شي شنو هالمكياج القوي اني مو كلتلج لتحطين بارز
_انتي من كل عقلج تحجين ..انت العروس وكلشي الج لاحكتني المكياج ترى كافي نيرمين زودتيها كلش
قاطع كلامنا ام زوج نيرمين..
_هلا عيني جناوي خاله شكد حلوة طالعه معرفتج
_ههه شكرا خاله خجلتيني
_اي خاله واني مطالعه حلوة شو كلش محد كلي
_يا انت كمر والله خاله ماكو داعي اكول وهنيال ابني عليج ..ربي يهنيج بنتي ديربالج ع ابني
_ييي خاله نيرمين طالعه عبالك لعابه
_ايي والله كلها تكولي شلون عروس مختارين لابنج
_ايي خاله والله اختي ورده انشالله تجربوها وتشوفون
_ايي ادري..انشالله يوم لالج ونفرح بيج..اكولج خاله هوايه نسوان يسألوني عليج وولدهم احسن ولد وخيره الشباب. اذا ماعندج شخص معين براسج اني انصحج بيهم
_لا خاله هسه اني ممفكره اتزوج وماكو شخص معين براسي
_ع راحتج خالاتي يلا اني اروح
_اوك خاله..
_اي عيني ولويش ممفكره بالزواج_نرمين_
_اتصور هاي قناعتني اني مو قناعه واحد ثاني بالوكت الي بعجبني اتزوج بي اتزوج ...
_اوو انتي ضلي هيجي ..يلا روحي شوفي خاف امي تحتاجج بشي
_رايحه ماكو داعي تطرديني لان زوجج اجه
اتى العريس الى كوشه العرس..
_مبروك ...انشالله الحياه السعيده
_الله يبارك بيج..يوم لالج
_هه انشالله ..يلا عن اذنكم اخذو راحتكم
_اذنج وياج
بعد مانزلت من كوشه العرس ..بقيت اختي وزوجها يتكلمون ويضحكون..
وبعدها وزع العشاء في الصاله..وبعدها عرض مقطع بالشاشه عن اختي وزوجها من مرحله الطفوله حتى ايام قبل الزواج .. بعدها جاء قالب الكيك حيث كان بخمس طوابق باللون الابيض والورد الوردي ... وكان على راس القالب تمثالان عروس وعريس ..كان القالب فخم جدا..وبعد قطع الكيك ..
رقص العريسان على انغام اغنيه وائل جسار ..
عايز اتطمن عليك..
وانسى روحي بين ايدك ..
وافضل اجري واجري بيك وبقى مش عارف مكاني
نفسي اكمل عمري جنبك ..نفسي اعيش عمرين معاك
وانسى حظني جوه حظنك وابقى اتنفس هواك..
عمري منسيتك ولااقدر اعيش حياتي الابيك..
ليل نهار بسرح وافكر غصب عني حبيبي فيك...
انتهت الرقصه...
_لج جوجه هاي الاغنيه مو جنتي انتي تحبيها
_اي ..وهي لان اني جنت احبها واتمنى ارقصها هي رقصتها..تحب تعيش كلشي جنت اريده
_اوو عوفيها هالغياره ...الله يهديها
_الله يهنينهم مااتمنى غير هالشي
وقاطع حديثنا اغنيه ساجده عبيد انكسرت الشيشه
حيث قام كل من في القاعه يرقص عليها ماعدا نرمين لانها اعتبرت هذه الاغنيه سوقيه لايجب ان تشغل في حفلتها
رقص الجميع بفرح ..وبعدها رقصنا رقصه الجوبي..
وبعدها رقصه البطريق ...
قبل انتهاء حفله الزفاف طلب من الفتيات الغير متزوجات ان يقفو وراء العروس لاجل التقاط الورد اي تعتبر بشره خير لمن تلتقطها اي هي ستتزوج بعدها..
وقفت جميع لفتيات ماعداي انا ...
اتى صديقي هشام..
_لج جنى شنو تردين تبقين معنسه دروحي بلكي تلزمين الورد وتعرسين
_اصلا منو كلك اريد اتزوج ...مااريد ولا افكر بالزواج
_لج واني منو يتزوجني ...
_عابت اعوف الولد كلها واخذك انت..
_ايباه ...لج شايفتني اخبول اصلا وين توكعين بواحد مثلي..
_هههه اي تشبه عبعوب انت ..سبحان الخالق الناطق
_ايا جكمه اني اشبه عبعوب ..
_جكمه بعينك ابو خشم ...روح منا يلا رح يزفوهم
_ديلا ع اساس اني ميت ع الوكفه وياج
_لا حباب ضل...يلا روح زعجتيني
_اوي داده انزعجت ام خشم القزمه..
_قزمه بعينك ...شبيه طولي 165 بعد شتريد
_اي قابل مثل طولي 188
_اي الطول طول النخله والعقل...
_اي كمليها لج ام لسان ...
_ها لا اني اروح ماما صاحتلي اروح اجهز غراض نيرمين راح تطلع الزفه
_هههه الزمج الزمج وين تروحين مني هم يخلص العرس اصبريلي
_ههه ادري بيك حباب متسوي شي تعالي فرح اخذيني من هذا المتوحش..
_ههه هسه اني المتوحش اصبرلي اذا مااطلعها عليج..
_ههه باحلامك..
ذهبت الى اختي لاودعها وابارك لها على زفافها..وبكيت لانني سابقى وحدي في المنزل...بكت ووالدتي بكاء كثير ...احتضنتي فرح لانها تعرف سبب بكائي..
زفوك بتوالي الليل..
روح مبارك الزفه...
رجعت الى المنزل ..ذهب والدي ووالدتي الى غرفتهما ..وجدتي ايضآ..
وبقيت انا وحدي ومن هنا اشتعلت نيران الالامي ..
ومن هنا بدأت الحكايه...
خلص البارت الاول ..اتمنى عجبكم..سويته قصير حتى اشوف مدى اقبالكم عليه...
لتبخلون عليه بالفوت +كومنت..
وانطوني اقتراحاتكم ع كلشي بالقصه اذا عجبكم الغلاف او اسم القصه اي اقتراح منكم استقبله ...
احبكم كلكم❤
@miss-meo

هّـذِهّ الحكايةاقرأ هذه القصة مجاناً!