HAYAAN MONG MAHALIN KITA HANGGANG HINDI KO NA KAYA

Hayaan mong mahalin kita hanggang di ko na kaya

Wag mo akong pigilang ang aking nadarama’y ipakita

Pasasaan ba’t mapapagod din ang puso kong aba

Na huli ang pagdating at hindi ka nakuha

Hayaan mo lang na ika’y aking bantayan

Darating ang araw na di mamamalayan

Ako ay wala na't di na masisilayan

Pagka’t nagsawa na't biglang natauhan.

Hayaan mong ibigin kita ng walang kapalit

Ang makita ka’y pumapawi sa anumang pait

Hayaan mong isipin ko ang iyong halik

Di ko maitagong sayo’y nananabik

Hayaan mong ako’y patuloy na sayo’y masaktan

Upang bukas paggising ko’y mauntog sa katotohanan

Na hindi ka akin at sa iba’y nakalaan

Na ako’y ganon din at mayrong sinasaktan

Hayaan mo at hindi na rin ito magtatagal

Di habambuhay na ako’y bulag at utal

Hayaan mong sayo ako ay masaya

Hayaan mong mahalin kita hanggang di ko na kaya.

__________________________~~*~~__________________________

Salamat sa panahong iniukol mo sa aking pahina - ito ang nagbibigay dahilan sa akin upang patuloy na sumulat at magbahagi. Sana'y mabasa mo rin ang iba ko pang mga tula at kwento at makalikha ako ng ngiti/luha sa 'yong mukha. Hindi ko sasayangin ang panahon mo. Lubos kong ikaliligaya kung makapag-iiwan ka ng iyong rekomendasyon, puna o anumang reaksyon patungkol sa aking akda.

Nagmamahal,

Sami Bathan de Ramos