Wonderland Magical Academy: Touch of Fire (Cloak PopFiction)

Chapter 14: Air vs. Earth

XYRA

Alas tres ng madaling araw nang magising ako. Wala akong matinong tulog dahil hindi mawaglit sa isip ko ang pagnanakaw ng halik ni Clauss sa 'kin. Nagpasya akong lumabas sa tent kahit madilim pa sa labas. Balak kong maligo sa waterfalls. Nagdala ako ng towel at damit na pampalit. Inaantok pa ako pero hindi na ako makatulog. Nagwala na naman ang puso ko nang maisip si Clauss. Naaasar ako.

Nakarating ako sa waterfalls. Namangha ako sa ganda ng lugar dahil sa mga alitaptap sa paligid na nagbibigay liwanag doon. Nakasuot ako ng t-shirt at cotton shorts nang magdive sa tubig. Malamig ang tubig kaya medyo nanginig ako. Makalipas ang ilang minuto ay nasanay rin ako sa temperatura ng tubig.

Tuwang-tuwa ako sa paglangoy nang mapansin ko ang isang pigura ng tao. Dahil sa liwanag na nagmumula sa mga alitaptap nakilala kong si Selene 'yon. Aanyayahan ko sana siyang maligo pero biglang nagbago ng galaw ang tubig sa waterfalls. Naalerto ako. Huli na nang maramdaman ko ang humihilang puwersa sa 'kin pailalim sa tubig.

"Shit!" naibulalas ko bago ako nahila pailalim. Large whirlpools occurred and pushed me to drown at the bottom of the waterbed. Hindi ko magamit ang kapangyarihan sa ilalim ng tubig. Hindi ko na rin kayang pigilin ang paghinga.

Pinilit kong lumangoy paitaas pero pilit akong hinihila pailalim. Namanhid ang kaliwa kong paa kaya hindi na ako makalangoy nang maayos. Hindi ko na napigilan ang pagbuka ng bibig. Bumibigat na ang pakiramdam ko at unti-unting nawalan ng malay.

Someone save me please...

CLAUSS

Hindi naging maayos ang tulog ko. Bakit ba bigla kong naisipang halikan si Xyra? Hindi ko alam kung anong pumasok na katangahan sa utak ko. Basta ang alam ko, masaya akong makita si Xyra pagkalipas ng dalawang buwan.

Nakarinig ako ng kaluskos sa tent ni Xyra na katabi ng akin. Napakunot-noo ako nang marinig ang tunog ng zipper ng tent niya. Narinig ko ang mga yabag niya palayo. Gusto ko siyang sundan pero nahihiya ako. Tinakpan ko ng unan ang ulo at pinilit bumalik sa pagtulog. Ipinikit ko nang mariin ang mga mata para alisin siya sa utak ko pero hindi ako mapakali sa higaan. Napilitan akong lumabas sa tent. Nakita ko si Selene na naglalakad palayo kaya sinundan ko siya nang tahimik.

Tumigil siya malapit sa waterfalls. Naagaw ang pansin ko ng babaeng naliligo roon, si Xyra. Tuwang-tuwa siyang lumalangoy. Daig pa niya ang bata. Aalis na sana ako sa lugar dahil baka mapagkamalan pa akong namboboso pero napansin ko ang pagbabago ng daloy ng tubig. Kinutuban ako ng masama.

Nakita ko ang paglubog ni Xyra sa tubig at ang whirlpool na lumamon sa kanya. Natitiyak kong kagagawan iyon ni Selene. Napatakbo ako kay Selene para patigilin siya.

"What do you think you're doing? Shit! Stop it, Selene!" sigaw ko. Nagulat si Selene sa pagsigaw ko. Napansin ko si Akira na tumatakbo papalapit sa kinaroroonan namin. Hindi pa rin pinapatigil ni Selene ang whirlpool kaya naaasar na ako. Matagal nang nakalubog sa tubig si Xyra.

"Akira, stop Selene! I'll try to save Xyra!" sigaw ko kay Akira.

Tumakbo ako papunta sa waterfalls at nag-dive. Hindi ko akalaing malalim 'yon. Pinilit kong hanapin si Xyra pero hindi ko siya makita. Kakapusin ako ng hininga kapag lumangoy pa ako sa ilalim. Medyo madilim kaya nahihirapan akong hanapin si Xyra. Lumangoy ako paitaas upang mag-ipon ng hangin sa baga bago muling sumisid pailalim. Iniiwasan ko ang madala ng mga whirlpools.

Malalim na ang nalalangoy ko nang makita ko si Xyra. Wala na siyang malay pero ang nakakapagtaka hindi siya lumulutang paitaas. It's as if there's a force holding her in the bottom. Unti-unting nawala ang mga whirlpools. Nagsimula nang lumubog si Xyra. Lumangoy ako patungo kay Xyra at hinila siya paitaas. Natitiyak kong maraming tubig na nainom si Xyra.